“热狗”主席虫泰（郑松泰）倒插国旗区旗搞到一身蚁，立法会最快会喺下个月处理针对佢嘅谴责议案，如果有三分二以上嘅议员支持，咁佢就要同立法会讲声”Sayonara”嘞。虽然仲喺议会占超过三分一嘅反对派当中，有唔少议员话会保佢，但同”新民主同盟”咖喱饭（范国威）老友鬼鬼嘅教协监事韩连山就”温馨提示”，话只要有5个反对派议员缺席，谴责议案就会通过，动机系乜？唔使画公仔画出肠啦！

韩连山噚日喺facebook出嘅po（帖文），个背景阴阴湿湿咁，但都唔够内容咁”毒”到。佢话虫泰呢铺都算危危乎，因为只要有5个反对派议员缺席，谴责议案就会通过。唔知咖喱饭会唔会听老友话，到时辩论嗰阵话食个饭、见个客或者落个区就走咗去呢？而佢其他”议会阵线”拍档又会唔会跟风呢？尤其区诺轩一直同虫泰唔多啱，仲公开闹过对方收皮！

“人社”粉乘机雪旧恨

同时，喺”人社”（”人民力量”同社民连）支持者集散地、fb群组”花生当饭食，我地最积极”度，亦都有唔少方丈仲记得”热狗”同”人社”啲牙齿印，叫反对派借啲意送虫泰一程。

好似”Hung Chan”就叫反对派唔好自作多情，”郑议员1比69咁英明神武使×你救咩，人哋无要求你帮手自己冲埋去抽水抢光环，『热血』参选就系为咗辞职嘛，『泛民』唔好阻住晒啦。”

“Toni Chan” 就不满”热狗”次次选举都寸反对派选民含泪投票，仲用呢样嘢嚟鎅票，”点解『泛民派』今次又要含×投反对票保住呢条契弟狗呢？我真系百分百赞成佢哋由得『保皇党』劏×咗呢只狗！『热狗』系唔会知恩图报嘅！只会继续搵机会咬你春袋！”

“William Ng””和理非”上身：”单是『热血公民』在过去5年鼓吹勇武暴力这一点已经要谴责，我都唔明班饭团保这个贱人为乜？??家有十几友因勇武在监狱坐紧呀！你唔谴责『热血公民』为佢哋抱不平，仲话要出席保佢，有冇搞错呀！”