称“借镜”补选“区诺轩模式”

据报道，民协的何启明和江贵生前日在反对派的“元老会”上指，倘“钦点”李卓人作为“PlanB”，会造成不公，亦难以说服所有反对派支持者投票支持，并提出要以初选避免争端。

不过，“民主”系用嚟讲嘅啫，刘小丽都走晒后门，班大佬当然拒绝，仲用上次九龙西补选做例子，话嗰次初选搞到反对派内部“元气大伤”喎，所以应该“借镜”港岛嘅“区诺轩模式”，即系由“众志”直接钦点区诺轩代替被DQ嘅周庭参选嘅模式。

虽然冧掂晒班大佬，但点都要交吓戏。刘小丽昨日就去“拜访”民协领导层会面。民协主席施德来话支持刘小丽出战补选，但话反对派应通过初选来决定顶替人选，惟接受以“纯民调”作为初选的方法喎。

“人民力量”前主席刘嘉鸿就抵唔住颈发帖，揶揄传统反对派大佬话可“借镜”“区诺轩模式”嘅讲法：“原来钦点形式值得借镜，失觉晒（晒）。”

佢仲寸爆自称“自决派”嘅刘小丽“走后门”嘅做法：“又自决、又伞后新力量、又乜又×，到最后咪又系返去啲旧势力‘泛民’大佬到（度）倾分贜（赃）。连啲思维都退步过人，浪费时间。”

网民批李卓人“仇幼”

“Mei Wechner”就认为钦点没有好结果：“睇见区（诺）轩（在议会的表现）就心淡了！”“Stephen Chan”就针对李卓人：“当日D day（‘占中’商讨日），亲身感受到李卓人靴咁大个鼻，完全将‘学民仔’拒之门外。真正认清楚佢系咩人！”

“Willy Chan”亦质疑：“冯检基出嚟就全天候话佢政治关爱坐（座），差唔多年纪嘅李卓人就全力支持......”“Daniel Chan”虽然赞成钦点，但就唔锺意由李卓人做后备：“我唔支持李卓人，始终做得太耐，冯检基比（俾）人唾弃都系呢个原因，比（畀）李卓人出等同自打嘴巴！”

松粉怨“竹笋”又搞搞震

当然，撑钦点嘅人亦不在少数，特别系一直话姚松炎输系因为冯检基主导嘅民协冇帮手拉票嘅松粉。“Vincent Ngan”声称：“好心民协唔好咁多事啦，上次补（选）冯检基系（喺）度搞搞震，今次又系（喺）度无风起浪......大家唔好理民协，民协讲咩都好，都唔好理佢，无人理佢，佢自然会收皮。”